БИШКЕК, 24-апр. — Sputnik. Баткенде сейрек кездешкен Айгүл гүлү таштандыда өсүүдө. Бул тууралуу Facebook социалдык түйүнүндөгү баракчасына Сергей Макаров жазып чыкты.
Соцтармакка жарыялаган видео 20-апрелде Айгүл-Таш тоосунда тыртылган. Анда сейрек кездешкен гүлдүн жанында бөтөлкө жана желим баштыктардын жатканын көрүүгө болот.
"Тоодо таштанды салган челектер бар. Бирок алар ылдый жакта, жогору жагында жок. Ошондуктан тоого чыккан көпчүлүк таштандыны ой келди таштап салат. Мен жергиликтүү кароолчулар менен сүйлөшкөнүмдө, алар эч нерсе кыла албай жаткандыктарын айтышты. Мен видеокамера коюп, тазалыкты сактабагандарга айып пул салууну сунуштадым. Бирок чечимди алар кабыл албайт да", — деди Макаров.
Ал ошондой эле жергиликтүү тургун менен таштанды чогултканын, бирок ага карабай тоонун чокусунда акыр-чикир калганын кошумчалады.
Аталган видео боюнча Sputnik Кыргызстандын кабарчысы өкмөттүн Баткен облусундагы ыйгарымдуу өкүлү Абиш Халмурзаевге кайрылды. Ал келген адамдар айлана-тегеректи булгап жатканын, ошол эле маалда тоонун айланасын кызматкерлер тазалай турганын билдирди.
"Эл деген эл экен да. Учурда гүлдүн гүлдөп жаткан учуру, мындан улам келген элдин саны дагы арбын. Кечээ беш миңдей киши келген. Мен видеокамера орнотууга макулмун, бирок жергиликтүү бюджеттин аны алууга мүмкүнчүлүгү жетпейт", — деди Халмурзаев.
Кошумчалай кетсек, сейрек кездешкен гүл Кызыл китепке киргизилген. Баткен облусунун жүзү болгон гүл Кыргызстанда Түркстан кырка тоолорунда гана өсөт. 25-апрелде Айгүл гүлү майрамдалып, жыл сайын бул маалда туристтердин агымы көп болот.
