Коомчулукта Кыргызстандан чет өлкөгө дааватка чыккандар, өзгөчө Индия, Бангладеш жана Пакистанга баргандар кызуу талкууланууда.
Бул тууралуу муфтияттын Даават, үгүт-насаат, ар түрдүү агымдар жана жаштар менен иштөө бөлүмүнүн башчысы Билал ажы Сайпиев билдирди.
Анын айтымында, дин башкармалыгы өлкөдөгү даават ишин көзөмөлдөйт, ал эми чет өлкөдөгү даават ишин карай албайт. Бирок мекендештер барып жаткан өлкөлөр Матрудий акыйдасын кармангандар.
"Муфтият Кыргызстандын ичиндеги даават ишине жооп берет. Координациялап, бара турган жерин тактайт. Ал эми сыртка, мисалга Индия, Бангладеш, Пакистанга кеткендер жөнөкөй эле туристтик виза алып кетишет. Биз аларга жолдомо дагы бербейбиз, чет жактагы чоң мечиттер менен байланышыбыз жок. Бирок, кудайга шүгүр, азыркыга чейин эч кандай терс окуялар каттала элек. Эске сала кетчү жагдай Индия, Пакистан, Бангладеш дүйнөдөгү Ахли Сунна жааматынын Ханафий масхабынын Матрудий акыйдасын кармаган өлкөлө. Ал жакта негизинен кыргызстандыктар ислам динин үйрөнгөнү барышат", — деди Сайпиев.
Андан сырткары, ал дааватка чыгуунун 20 эрежеси бар экенин, алардын ичинде барган мамлекеттин саясатына жана масхабдарга кийлигишүүгө уруксат берилбей тургандыгын кошумчалады.
Ошондой эле жергиликтүү мечиттердин тартиптери дагы бар. Аларга ылайык, адеп-ахлагы начар, тартиби жок адамдар чет өлкөгө дааватка жиберилбейт.
