БИШКЕК, 17-апр. — Sputnik. АКШнын United Airlines авиакомпаниясы өзүнүн үйлөнүү тоюна учуп бараткан түгөйдү учактан чыгарып салып, кайрадан коомчулуктун көңүл чордонунда болууда. Бул тууралуу Reuters агенттиги билдирди.
Маалыматка караганда, Майкл Хол менен Амбер Мексвел баш кошуу үчүн Коста-Рикага баратып, учактагы бош орундарга отуруп алышкан. Бул орундар башкаларга караганда ыңгайлуу келгендиктен, билет баасы да кымбатыраак болуп, мындан улам түгөйлөрдү ал жерден чыгарып салышкан. Эки жаш ыңгайлуу орундар үчүн кошумча акча сунуштаганы менен борт кызматкерлери абалды мындай жол менен чечүүдөн баш тарткан.
"Бул кадамыбыз мынчалык көйгөй жаратарын ойлогон эмеспиз. "Биринчи" класска өткүбүз деле келген эмес, болгону эконом-класста эле бир нече катар алдыга отурганбыз", — деди Хол.
Ал эми авиакомпаниянын өкүлдөрү "түгөйлөр акча төлөбөй туруп, бир нече ирет кымбат орундарга отурууга аракеттенгенин", бул жүргүнчүлөр эртеси Коста-Рикага жөнөтүлө турганын кабарлашкан.
United Airlinesка байланыштуу жаңжал буга чейин Чикаго-Луисвил каттамындагы учакта болгон. Анда "ашык" жүргүнчүнү колу-бутунан кармап чыгарып салышкан. Адамды күчкө салып борттун ичинен чыгарган учур коомчулукта кызуу талкууланган. United Airlines компаниясынын расмий өкүлү бул окуяны учактагы салондун толуп калганы менен түшүндүргөн.
