Лукашенко ЕАЭБдин ички маселелерин активдүү чечүүнү колдоду

БИШКЕК, 14-Апр. — Sputnik. Борбор калаада өтүп жаткан Евразиялык экономикалык жогорку кеңештин кеңейтилген жыйынында Белоруссия президенти Александр Лукашенко "ЕАЭБдин башка мүчөлөрүнүн укугун дискриминациялаган" документке мораторий киргизүүнү сунуштады.

Белоруссиянын өлкө башчысы 2016-жылы биримдиктеги товар алмашуу көлөмүнүн төмөндөп кетишинин себептерин жоюу ишке ашпай калганын эскертип өттү.

"Алмазбек Атамбаев айткандай алгач биримдиктин ички маселелерин чечүү керек. 2017-жылы уюмду буттан тургузуу зарыл. Булардын ичинен алгачкы жумуш — ЕАЭБдин катышуучуларын дискриминациялаган жаңы укуктук актыларды кабыл алууга мораторий киргизүү. Бул процесске Евразиялык экономикалык комиссия көз жүгүртүп туруусу зарыл. Мындан сырткары, аталган комиссиянын ички рынок шартындагы чектөөлөр боюнча докладын угуп туруубуз керек", — деди Белоруссия президенти.

Ал ошондой эле экономикалык биримдикти биргелешип түзүү башка өлкөлөргө да кызык экендигин кошумчалады.

"Бирок келишим түзүп койгонубуз менен аны ишке ашыруу такыр башка болуп калып жатат. Белгилей кетсем, эркин соода-сатык түзүү боюнча келишим Белоруссиянын кызыкчылыгына туура келет", — деди Лукашенко.

Ал макулдашылган келишимдерди толук кандуу колдонуп, биримдикти өнүктүрүүгө чакырды.