БИШКЕК, 14-апр. — Sputnik. Кыргызстандын президенти Алмазбек Атамбаев Евразиялык экономикалык жогорку кеңештин кеңейтилген жыйынында ЕАЭБ мамлекеттеринин ортосундагы жарандарды депортациялоого жумшагыраак мамиле жасоого чакырды.
Өлкө башчы товарлардын, кызматтардын жана эмгек ресурстарын ээн-эркин жүгүртүүнү камсыздоо боюнча аракеттерди улантуу зарылдыгын белгиледи.
Атамбаев Кыргызстан үчүн айыл чарба, кайра иштетүү өндүрүшүн жана жеңил өнөр жайды өнүктүрүү өзгөчө мааниге ээ экенин айтып, ушул жаатта көрсөткөн көмөгү үчүн Казакстан менен Россияга ыраазычылык билдирди.
"Эмгек рыногун түзүү зарылдыгы бар, мында негизинен пенсиялык камсыздоо боюнча макулдашууга көңүл буруу керек. Албетте, иш издеп чет жакка чыккан жарандары көп мамлекет катары майда-барат административдик мыйзам бузгандарды депортациялоо маселесинде либералдуу болууну өтүнөбүз", — деди Атамбаев.
Өлкө башчы электр энергетикалык рынокту өнүктүрүү муктаждыгын дагы баса белгиледи.
