БИШКЕК, 8-апр. — Sputnik. Дайынсыз жоголгон 14 жаштагы жана 11 жаштагы балдар үйүнө кайтып келгенин ИИМдин маалымат кызматы билдирди.
Белгилей кетсек, 2-апрелде болжол менен түнкү саат 11:00дөр чамасында балдар үйүнөн чыгып кетип, ошол бойдон дайынсыз жоголгон. Чүй облусунун Москва райондук ички иштер бөлүмү балдарга издөө жарыяланган. Ошондой эле социалдык тармактарга да жарыяланган.
"Милиция балдардын өзгөчө белгилерин тизмектеп, Кайгуул милициясына маалымат берген. Издөө иштерине кылмыш иликтөө бөлүмүнүн кызматкерлери дагы тартылып, балдар барышы мүмкүн болгон бардык даректер текшерилген. 7-апрелде алар үйүнө өздөрү келишкен", — деп ИИМдин маалымат кызматы билдирди.
Кичинекей балдарды чоң энеси багат. Алардын бирөөсүнүн апасы чет жакта иштеп жүрсө, экинчисиники Бишкекте турат. Учурда түшүндүрүү иштери жүрүп, балдар бул убакыт аралыгында кайсы жакта жүргөнү текшерилүүдө.
