БИШКЕК, 3-апр. — Sputnik. Кыргызстандагы дарыгерлер бир жума бою эл аралап бекер эмдөө жүргүзүшөт. Бул тууралуу Саламаттык сактоо министрлигинин маалымат кызматынан кабарлашты.
Мындай иш-чара европалык иммунизациялоо жумалыгынын алкагында 24-30-апрель күндөрү жүргүзүлөт. Саламаттык сактоо министрлиги 25 көчмө жана медицина кызматкерлеринин 22 мобилдик бригадасын түзүп, алар жаңы конуштарды, айылдарды жана жайыттарды кыдырып эмдөө пунктуларын уюштуруу менен алектенишет.
Эмдөөлөрдүн арты менен кызылча, кургак учук, көк жөтөл, гепатит В сыяктуу оорулар басаңдап калганы белгиленүүдө.
"Тилекке каршы, иммунизациялоодон баш тарткандар дагы бар. Кээ бири диний ишенимдерге байланыштуу эмдөөдөн өтпөсө, дагы бири дары сайылгандан кийинки оорудан коркушат. Жыл сайын эмделбеген балдардын саны өсүп жатат. Бул инфекциялык оорулардын күчөшүнө алып келиши ыктымал", — деп айтылат маалыматта.
Кыргызстандагы балдар үчүн вакциналардын бардыгы БУУнун Балдар фонду тарабынан таратылат. Каражаттар Дүйнөлүк саламаттык сактоо уюмунун жогорку даражадагы тажрыйбасына ээ болгон эң мыкты өндүрүшчүлөр тарабынан жасалат.
