БИШКЕК, 31-мар. – Sputnik. “Коррупция” беренеси боюнча айыпталып жаткан КСДП фракциясынын депутаты Музаффар Исаковго тергөө учурунда Кыргызстандан чыгууга УКМК тыюу салып, анын өзүнөн тил кат жаздырып алганын Улуттук коопсуздук комитетинен кабарлашты.
Музаффар Исаков 2010-2015-жылдар аралыгында райондук архитектура жана мамкаттоо кызматкерлери менен сүйлөшүп 14,34 гектар айыл чарба багытындагы жерди жеке курулуш иштерин жүргүзүүгө берген деп шектелүүдө.
Маалыматка караганда, Исаков Жалал-Абад облусунун Сузак районундагы Таш-Булак айыл өкмөтүнүн башчысы болуп турганда 315 мыйзамсыз токтом чыгарган. Ошондой эле тергөө маалында жарандар жер тилкелерин бир жарым миң доллардан үч миң долларга чейин сатып алышкандыгын билдиришкен.
Депутатка карата Кылмыш жаза кодексинин 303-беренеси (коррупция) боюнча кылмым иши козголуп, тергөө иштерин жүргүзүү УКМКга тапшырылган.
