БИШКЕК, 29-мар. — Sputnik. Белоруссиянын Гродно шаарында 89 жаштагы кемпир өзүнө массаж жасаткандан кийин көз жумган. Бул туурасында Sputnik Белоруссия агенттиги облусттук ички иштер башкармалыгына таянуу менен билдирди.
Маалыматта кемпир жаш курагына байланыштуу массаж жасатуу муктаждыгы жаралгандыктан адистен жардам алууга барганы айтылат.
"Алган массаждан сырткары ден соолукту чыңдоочу көнүгүүлөрдү да жасаган. Мунун соңунда кемпирдин абалы начарлап, ооруканага жеткирилген. Бирок арадан көп өтпөй эле ал каза болуп калган", — деп айтылат ОИИБдин маалыматында.
Буга шектелип ошол эле шаардын 37 жаштагы жаранына кылмыш иши козголгон. Тергөөнүн натыйжасында массажисттин кесиптик билими жана иштөөгө лицензиясы да жок болуп чыккан.
Мыйзам боюнча жети жылга чейин эркинен ажыратуу жазасы каралган.
