БИШКЕК, 26-мар. — Sputnik. Кыргызстанда анын ичинде Бишкек шаарында жолдордун абалы көңүл жубатарлык эмес.
Март айынын башында жол кырсыгы катталып, анда эки унаа кагышып, төрт баланын мээси чайкалган. Окуяга жолдогу аң-чөнөктөр себеп болгону айтылган.
Ал эми өлкөнүн айрым шаарларында жыртылган жолдорго шагыл аралашкан топурак төгүлүп жамаачыланган.
Sputnik Кыргызстан агенттиги башка өлкөлөрдө аң-чөнөктөрдү оңдоодо кандай ыкмалар колдонуларын билип көрдү.
Англия
Заманбап жабдуу жана техника Англиянын Сандерленд шаарында жол-эксплуатациялоо ишканасынын кызматкерлеринин жумушун бир аз болсо да жеңилдетти. Ал жактан ремонт иштерине бир нече бригада чыгып албай, баарына бир киши эле жетишип коет экен. Атайын жабдуунун жардамы менен алгач аң тазаланып, андан соң ага муздак битум эмульсиясы куюлат. Андан соң гана асфальтбетон аралашмасы төшөлөт.
Кытай
Мындай жабдууларды Пекиндин жол кызматкерлери да пайдаланышат. Бул жакта бир чарчы метр жерди Кытайдын жолчулары беш мүнөттүн ичинде жасап бүтүп коюшат.
Швеция
Швецияда жолдун аң-чөнөк жана жарака кеткен жерлерин асфальттоо ишинде ата мекендик ыкма колдонулат. Анда Savalco SR 801/1502 унаасы шагыл менен суюктукту аралаштырып өзү куюп, жумушчу күчтү талап кылбайт. Бир адам башкарган компьютерлешкен аппарат баарыне жетишет. Швециянын жолчулары кышкысын да кыйынчылыксыз иштей алат. Видеодогу оңдоо иштери кыш мезгилинде аткарылган.
Малайзия
Видеодо Малайзия шаарларынын биринде магистралдык жолду асфальттоо иши көргөзүлгөн. UltraCrete Instant Road Repair аталышындагы кошулмасын чуңкур жерге куюшкан. Бул ыкма оор унаалардын кыймылы токтобогон жана алардан көбүрөөк жабыркаган жерлерге колдонулат. Ошондой эле бул аралашманы жогорку температурада да колдонсо болот.
Бразилия
Маалым болгондой Бразилиянын шаарларында да жолдогу аң-чөнөктөрүн жасоого Ultracrete Instant Road Repair атайын аралашмасы колдонулат.
