БИШКЕК, 21-мар. — Sputnik. Президент Алмазбек Атамбаев кыргызстандыктарды Нооруз майрамы менен куттуктады. Бул тууралуу өлкө башчынын маалымат кызматы билдирди.
"Ата-бабаларыбыз илгертен эле жаздын келишин, чөптүн чыгышын, булак көзүнүн ачылышын жакшылыкка жорушкан. Ошондуктан Нооруз токчулуктун, мол түшүмдүн, ырыскынын майрамы катары белгиленген. Бул күнү эл журттун, мал-жандын аман-эсен, тынч, кырсыктан тышкары болушун тилеп, Жаратканга сыйынышкан. Соко чегип, жер бетин алгач жолу тилишчү. Сүмөлөк кайнатып, ар бир үй-бүлө сый тамагын жасап, айыл-апасы менен чогуу майрамдашчу", — деп айтылат маалыматта.
"Мына ушундай жооптуу мезгилде Кыргызстан элине ынтымак жана биримдик гана керек. Өлкөнүн жана балдарыбыздын келечеги кандай болоору өзүбүзгө гана байланыштуу. Ошондуктан ойлоно турган, мекенибизди гүлдөтүү үчүн жеңди түрүп, жапырт иштей турган учур келди", — деп жазылат өлкө башчынын куттуктоосунда.
Атамбаев андан сырткары келе жаткан жыл ырыс-кешиктүү болуп, элге, жерге берекет беришин баса белгилеген.
