Керим Турапов: жер боюнча азырынча сотко кайрылууну ойлоно элекмин

БИШКЕК, 17-мар. — Sputnik. Кыргыз эл артисти Керим Турапов Бишкек шаарынын 8-кичи району тараптан берилген жерди мыйзамдуу түрдө сатып алганын Sputnik Кыргызстан агенттигине билдирди.

Белгилей кетсек, Бишкек шаардык соту Тураповго берилген жер тилкеси мыйзамсыз деген өкүм чыгарган болчу. 

Тураповдун айтымында, бул маселе 2013-жылдан бери эле созулуп келе жатат. Буга чейин райондук жана шаардык сот ишти үч жолу карап, үчөөндө тең жер тилкеси мыйзамдуу сатып алынганы боюнча өкүм чыгарган.

"Эң башкысы менин Кудай алдында абийирим таза. Бул жер тилкесин акчасын төлөп мыйзамдуу түрдө сатып алгам. Квитанциясы чөнтөгүмдө. Прокуратура дагы "Керим Турапов ак ниеттүү сатып алуучу, бул кишиге эч кандай дооматыбыз жок. Доомат Бишкек мэриясына карата коюлууда" деп айтып жатышат. Эгерде мыйзамсыз болсо биринчи сотто эле аны айтыш керек болчу да. Шаардык соттун акыркы чечимине абдан таң калдык. Ошондой эле прокуратурадан дагы "аталган жер тилкесин текшердик, мыйзам бузуу жок. Курулуш иштерин баштай берсе болот" деген кат келген", — деди эл артисти.

Ал өз сөзүндө аталган жер тилкесин кызыл китеби менен 11 миллион сомго алганын, акчасын беш жылдын ичинде төлөп бүткөнүн айтты.

Турапов 8-кичи райондо берилген жерге түрк компаниясы көп кабаттуу үй салып жатканын маалымдады.

"Курулуш иштери бүтүп калды. Мага жердин ордуна курулган имараттан вокалдык мектеп үчүн орун беришмек", — деди ал.

Турапов шаардык соттун чечимин жогорку инстанцияга арыздануу боюнча ойлоно электигин, бардыгын убакыт көрсөтөрүн баса белгиледи.