БИШКЕК, 14-мар. — Sputnik. Бишкекте Нооруз майрамына карата сүмөлөк фестивалы өтөт. Бул тууралуу фестивалдын уюштуруучуларынын бири Элнура Кулуева билдирди.
Анын айтымында, 20-март күнү 40 казанга сүмөлөк кайнатылып, 21-март күнү шаар тургундарына таратылат.
"Нооруз майрамында жаңы жашоо башталды деген жакшы тилек менен сөзсүз түрдө сүмөлөк кайнатылат. Былтыркы жылы уюштурулган фестивалда жети облусту символдоштуруп жети казанга сүмөлөк бышырылса, быйыл кырк уруудан турган элди ынтымак, биримдикке чакыруу максатында сүмөлөк 40 казанга жасалат. Ошондой эле кыргыздын бай мурасын көрсөтүү максатында иш-чарага Кыргызстандагы элчиликтердин да өкүлдөрү чакырылып жатат", — деди Кулуева.
Фестиваль "Супара" этнокомплексинде өтүп, ал майрамдык оюн-зоок менен коштолору кошумчаланды.
Майрамдык сүмөлөктү даярдоо
© Sputnik_Infographics
