БИШКЕК, 7-мар. — Sputnik. Белоруссиянын премьери Андрей Кобяковдун билдирүүсү кине коюуга барабар экенин Россия өкмөтүнүн башчысы Дмитрий Медведев Бишкекте өтүп жаткан Евразиялык өкмөттөр аралык кеңешинин жыйынында билдирди.
Анда Кобяков Россиянын саясатын кескин сындаган. Мисалы газдын баасы Белоруссияда Россияга караганда кымбат экенин айткан.
"Айырмачылык 38 пайыздан 110 пайызга чейин өстү. Анан кайдагы товарлардын эркин айлануусу? Белоруссиядагы электр энергиянын 98 пайызы Россиянын газынан алынарын жакшы билебиз. Кайдагы атаандаштык?" — деди ал.
Өз кезегинде орус премьер-министри Дмитрий Медведев эки тараптын жеке маселеси көп тараптуу аянтка да чыгып кеткен учурлар болгонун белгилеп, Белоруссиянын бул кадамын мисал катары айтты.
"Бул башка мүчөлөргө карата кине коюуга барабар. Уюмдун укуктарынан аша чаап колдонууга жол берилбейт, интеграциялык жараян мамлекеттерден бийик турат. Бул жерде 2-3 жакка тиешелүү маселелерди эмес, бардыгына тиешелүү болгон маселелерди карап жатабыз", — деди Медведев.
Россиянын премьер-министри ЕАЭБ эч кимди зордоп кармабай турганын, ал ар кимдин жеке тандоосу экенин кошумчалады.
