БИШКЕК, 6-мар. — Sputnik. Мамлекеттик мүлктү башкаруу фондусу "Альфа Телеком" (MegaСom соода маркасы) жабык акционердик коомун сатуу боюнча жаңы аукцион жарыялап, баштапкы баасын 13,5 миллиард сом деп баалады. Бул тууралуу аталган мекеменин сайтында айтылат.
Аукцион 5-июнга белгиленген.
"Компаниянын баштапкы баасы 13,5 миллиард сом деп бааланууда", — деп айтылат маалыматта.
100 пайыз акциясы мамлекетке караган ири уюлдук оператор февраль айында 300 миллион долларга бааланып, сатыкка коюлган. "Альфа Телеком" боюнча аукцион былтыр май айында эле өтмөк. Бирок табыштамалар түшпөгөндүктөн мөөнөтү бир нече жолу жылган. Жыйынтыгында ошол кездеги Мамлекеттик мүлктү башкаруу фондусунун жетекчиси Алмаз Кадыркулов отставкага кеткен. Кийинки аукцион 16-декабрга 14 миллиард 255 миллион 250 миң сом менен белгиленип, бирок ал да ишке ашпай калган.
