БИШКЕК, 25-фев. — Sputnik. Бүгүн, 25-февраль күнү, Жогорку Кеңештин депутаты Өмүрбек Текебаевдин үстүнөн 303 ("Коррупция") жана 166-беренелеринин ("Алдамчылык") негизинде кылмыш иши козголгонун Башкы прокуратура билдирди.
Иш УКМК тарабынан түшкөн материалдарды иликтөөнүн негизинде козголду. Атайын кызматка Текебаевди сот жоопкерчилигине тартуу өтүнүчү менен Россинын телекоммуникациялык компанияларынын ээси Леонид Маевский кайрылган.
"Арызда Маевский Текебаев 2010-жылы Убактылуу өкмөттүн төрага орун басары болуп турганда андан бир миллион доллар алганын жазган. Мында Текебаев Маевский үчүн ыңгайлуу шарт түзүп берүү милдетин алган", — деп айтылат маалыматта.
Билдирүүдө айтылгандай, алгач "Альфа Телеком" ЖАКтын башкармалыгына киргизүү, андан соң Маевскийге аталган уюлдук компаниянын акцияларын сатуу убадаланган. Мында Текебаев саясий жактан колдоо көрсөтүп, жалпы сумманын 10дон 15 пайызга чейинки акчасын алмак. Убактылуу өкмөттүн мүчөсү моюндаган милдетин аткарбай, опузалап коркутуу менен алган акчасын кайтарган эмес.
Кылмыш ишти иликтөө УКМКнын Тергөө башкармалыгына жүктөлдү.
Текебаев менен азырынча байланышууга мүмкүн болбой жатат. Бирок "Ата Мекен" партиясынын катчылыгы кылмыш иши тууралуу эч кандай маалымат түшпөгөнүн, партия лидери азыр Венада экенин билдирди. Текебаев ЕККУнун Парламенттик ассамблеясынын сессиясына катышуу үчүн кыргызстандык делегацияны жетектеп кеткен.
