Ошто үчүнчү көпүрөнүн курулушу башталды

ОШ, 15-фев. — Sputnik. Оштогу Сай-Бою жана Тилеке баатыр көчөлөрүн бириктирген көпүрөнүн курулушуна капсула салынды. Иш-чарага калаа башчысы Айтмамат Кадырбаев, шаардык кеңештин депутаттары, мекеме-ишканалардын жетекчилери жана шаар тургундары катышканын аймактык кабарчы билдирди.

Кадырбаев үчүнчү көпүрө Навои жана Түштүк Чыгыш кичи районунда салынган эки көпүрөдөн үнөмдөлгөн акча каражатынын эсебинен салынып жатканын белгиледи.

"Көпүрө 21,2 миллион сомго бүтүрүлөт. Курулуш иштери июль айында аяктайт", — деди калаа башчысы. 

Ош шаардык жолдор башкармалыгынын башчысы Арзыбек Жунусов Сай-Бою жана Тилеке баатыр көчөлөрүн бириктирген үчүнчү көпүрөнүн сметалык баасы 38 миллион сом, ал эми тендердик баасы 21,2 миллион сом экендигин билдирди.

Маалыматка ылайык, көпүрөнүн жалпы узундугу 45 метр, унаа жүрүүчү бөлүгү 7 метр, ал эми туурасы 15 метрди түзөт. 

Курулуш иштери "Сутранспромжилстрой" компаниясы тарабынан жүргүзүлөт.