БИШКЕК, 9-фев. — Sputnik. Түндүк — Түштүк альтернавалуу жолунун курулушунун алкагында Нарын дарыясы аркылуу өтө турган эстакадалык эки көпүрө курула турганын Транспорт жана жолдор министрлигинин маалымат кызматы билдирди.
Курулуштун экинчи фазасынын (Арал — Казарман жолунун 195-291 чакырымдары) алкагында төрт тоннель салуу каралган. Бирок кошумча жолдордун салынышы менен долбоорду оптималдаштыруу чечими кабыл алынган.
"Мында №2 жана №3 тоннелдерди эстакадалык көпүрө менен алмаштыруу пландаштырылып жатат. Алардын узундугу 396 жана 1086 метрди түзмөкчү. Ар биринин туурасы 13,5 метр болот. Азырынча көпүрөлөрдүн чыгымы тактала элек", — деп айтылат маалыматта.
Мекеменин айтымында, трасса Нарынды бойлой кеткен ичке жолдон өтүп, чукул бурулуштардан улам бир жээктен экинчи жээкке чыккан кыйма-чийме жол болот. Учурда жол салынып бүтө элек. Калган эки тоннель да курула элек, ал тоону айланып өткүдөй болуп салынары белгиленди.
I фаза Кызыл — Жылдыз, Арал, Казарман айылдары менен Жалал-Абадды бириктирип, узундугу 154 чакырымды түзөт. Анын алкагында Көк-Арт ашуусуна 3,7 чакырымдык тоннель курулат.
II фаза Арал — Казарман маршруту менен өтүп, 96 чакырымга жетет. Бул бөлүккө да 700 метрлик тоннель салынат.
III фаза 183 чакырымды түзүп, Балыкчы менен Кызыл-Жылдыз айылын бириктирмекчи.
Долбоордун эки фазасы Кытай тарабынан каржыланат. Бүгүнкү күндө Кыргызстандын түндүк менен түштүгүн Бишкек — Ош жолу байланыштырып турат.
