Ал эми дүйшөмбү күнү Башкы прокуратуранын сунуштамасын кароо үчүн ведомстволор аралык комиссия түзүлдү. Комиссия бир айлык мөөнөт ичинде Башкы прокуратуранын сунуштамасын карап чыгып, премьер-министрге тиешелүү сунуш берүүсү керек.
Тайырбек Сарпашев кызматынан убактылуу четтеп туруу чечимин тергөө иштерине жолтоо болбоо максатында кабыл алганын билдирди.
"Вице-премьер министр Жеңиш Разаков башында турган жана укук коргоо органдары кирген ведомстволор аралык өкмөттүк комиссия түзүлдү. Алар Башкы прокуратуранын сунуштамасындагы дооматтарды такташат. Ошондуктан мен бүгүн өкмөт башчыга убактылуу отставкага кетүү боюнча арыз жаздым. Бул иш боюнча менин күнөөм жок. Комиссия келтирилген дооматтарды тыкыр иликтейт деп ишенем", — деди Сарпашев.
Ошондой эле ал комиссияга тиешелүү документтерди берип көмөктөшүүгө даяр экендигин кошумчалады.
