"Дин маданиятынын тарыхы" усулдук материалынын коомдук талкуусу 20-февралга чейин уланат. Бул тууралуу Sputnik Кыргызстан агенттигине Дин иштери боюнча мамлекеттик комиссиянын Талдоо бөлүмүнүн башчысы Гүлназ Исаева билдирди.
Анын айтымында, ушу тапта материал 100дөн ашуун нускада чыгарылды.
"Дин тануу жана диний билим берүү жаатында концепция иштелип чыккан. Ошонун алкагында 2016-жылдын сентябрь айында 10 мектепке пилоттук негизде "Дин маданиятынын тарыхы" сабагы киргизилген. Азыркы маалда ага карата сын-пикир айтылгандыктан коомдук талкууга койдук. Талкуунун биринчи этабы 20-февралга чейин уланат. Ага ылайык, академиялык чөйрөдөн, теолог жана эксперттерден пикирлер жана сунуштар кабыл алынууда", — деди Исаева.
Аталган усулдук материалын иштеп чыгуу аракети 2016-жылы башталган. Ага Дин иштери боюнча мамлекеттик комиссия, Билим берүү академиясы жана эксперттер катышкан.
