БИШКЕК, 9-фев. — Sputnik. Жогорку Кеңештин жыйынында бир нече депутаттар Коомдук биринчи канал аркылуу көрсөтүлгөн "Келин" теледолбоорун эфирден алдырып салуу сунушун берди.
Ал эми парламентте "Келин" теледолбоорун жаптыруу маселесин Айнуру Алтыбаева (КСДП), Наталья Никитенко жана Аида Салянова (Ата Мекен) көтөрүп чыкты. Депутат Айнуру Алтыбаева КТРКнын байкоочу кеңешине гендердик жана юридикалык экспертиза жүргүзүү сунушу менен кайрылды.
Салянованын айтымында, реалити-шоу кыргыз үй-бүлөсүнүн маданияты менен баалуулуктарын бурмалап салган.
"Кайнене зөөкүрдүн ролун жаратып калган… Келиндерге карата каардуу эмес, боорукердик мамилени пропаганда кылыш керек. "Келин" теледолбоорун жабуу керек деп эсептейм", — деди Салянова.
Ал эми Никитенко теледолбоор келиндин негизги максаты кайненесине жагып кетүү экенин чагылдырып калганын белгиледи.
