Аталган реалити-шоу ушул жуманын ишембисинен тарта Коомдук биринчи каналда көрсөтүлө баштайт. Долбоордун жетекчиси Хадича Харсанова Sputnik Кыргызстан агенттигине кызыктуу берүү тууралуу кыскача айтып берди.
— Бүгүнкү күндө көпчүлүк кыздар интернетте отуруп, Insagram баракчасындагы жасалма жашоону эле билет. Мындан улам биздин негизги максат кадимки реалдуу жашоону ошол кыздар аркылуу чагылдырып, келин болууга даярдап, ар түрдүү жумуштарды жасоого тапшырма берүү. Биз эч нерсени ойлоп тапкан жокпуз, баары чыныгы реалдуу жашоонун негизинде болот. Сынактан уткан кыз жарым сепке сыяктуу баалуу белекке ээ болот.
— Баалуу белектерге сыр болбосо эмне кирет?
— Жеңип чыккан кыз белекке уктоочу эмерек, Түркияга эки кишилик эс алууга билет жана ашканада колдонулуучу идиш-аяктардын топтомун алат.
— Идея эмнеден улам пайда болду?
— Бул идеянын үстүндө үч жылдай ойлонуп, аны командам менен бирге иштеп чыгып отуруп акыры жыйынтык көрө баштадык.
— Сынакка канча кыз катышат?
— Башында кастингге алыскы Ат-Башы, Ысык-Көлдөн бери 30дай кыз келген. Алардын ичинен тандап отуруп 10 кызды долбоорго калтырдык. Тандалып алынган кыздардын көбү шаардык кыздар. Анткени алар адамдардын чыныгы жөнөкөй турмушундагы көп нерсени билишпейт, алсак, уй саап, нан жасагандан, огород иштеткенден алыс. Уй саамак түгүл уйду жанынан көрбөгөндөр бар.
— Кыздарды айылга алып барып жумуш жасаттыңарбы?
— Кыздар ал жакта жашайбы же үйлөрүнө барып-келишеби?
— Жок, кыздар ал жакта жашабайт, анткени буга ата-энелердин көпчүлүгү макулдугун берген жок, болгону тартаар күнү барып турабыз.
— Кыздар финалга кандай жол менен жетет? Же калыстар тобу барбы?
— Кыздарды тандоого атайын калыстар тобу деле жок. Ар бир келинди сындан кайнене өткөрөт эмеспи. Анын сыңарындай биздин кыздарды да сындан өткөрүп, иргеп турган кайненебиз бар. Ал — актриса Замира Сатыбалдиева. Ал эми алып баруучу Пазылжан Илимов. Алар кыздардын кандай жумуш жасап жаткандыгын байкап, анын баары камерага тартылат. Жыйынтыгында ар бир берүүдө тапшырманы аткара албаган бирден кыз четтетилип отуруп аягында финалист калат. Мисалы, биринчи сезондо кыздар боорсок жасап, камыр жууруп, уй саап, от жакканды үйрөнүшөт.
— Анан жыйынтык кандай болуп жатат?
— Буюрса, жакшы. Башында келгенде кыздардын теңинен көбү уй сааганды билбесе, азыр баары үйрөнүп, очокко от жагып, күрүч басып, боорсок жасаганды үйрөнүп калышты. Бул биринчи сезондун тапшырмалары болчу.
— Долбоор өзү канча убакытка чейин созулат?
— Үч айга чейин. Азыр биринчи сезонун тартып бүтүп калдык. Эми экинчи сезондо башка жаңы кыздарды тартабыз. Аларга огород иштетип, жашылча-жемиш айдаганды, жер иштеткенди үйрөнүшөт.
— Долбоорду тартып жаткан учурда кандай кызыктуу окуялар болду?
— Сынакка катышып жаткан кыздар жакында турмушка чыгышабы? Жигиттери барбы же жигитти да силер таап бересиңерби?
— Кыздардын көпчүлүгүнүн жигиттери бар. Айрымдарынын жакынкы аралыкта үйлөнүү үлпөт тойлору болот. Кээ бир кыздардын жигити жок, бирок жакын арада турмушка чыгабыз деген максаттары бар. Башында айрым кыздар "тажадык, кетебиз" дей башташкан, кичине убакыт өткөндөн кийин кыздардын жигиттери, ата-энелери "аягына чейин катыш, бир нерсе үйрөнүп ал" деп айтышыптыр.
— Кыздардын жаш өзгөчөлүгүнө да басым жасалабы?
— Албетте 18 жаштагы кыздар бул долбоорго катыша албайт. Бизде тартылып жаткан кыздардын жашы 20 жаштан 28ге чейинкилер.
— Бир туугандай болуп калсаңар керек?
— Ооба, сынактан четтетилген кыздар менен азыр да байланышып турабыз. Мен эле эмес кесиптештерим да бул долбоордун үстүндө абдан берилип иштедик. Бул биздин командабыз менен жасаган эксклюзивдүү теледолбоорубуз десек болот.
— Качан жана канчада чыгарын окурмандарга айтып коесузбу?
— Теледолбоорду ар ишемби КТРКдан кечки саат 19:20 көрүүгө болот.
