Асанов: соттолбогондугу боюнча справканы 10 мүнөттө берүүгө шарт түзүлөт
7 Бирдин айы 2017, 17:53
Электрондук өкмөт түзүлүп, соттуулук боюнча жаңы мыйзам кабыл алынса жарандар соттолбогондугу боюнча маалымдаманы 10 мүнөттө ала алат. Бул тууралуу ички иштер министринин орун басары Курсан Асанов парламентте Дастан Бекешевдин "Соттуулук жөнүндө маалымат маселелери боюнча мыйзамга өзгөртүүлөрдү киргизүү тууралуу" мыйзам долбоору каралып жатканда билдирди.
Демилгечинин айтымында, мыйзам долбооруна ылайык, ишке орношуп жатканда адамдын соттолгону же соттолбогону тууралуу маалыматты жарандын өзү эмес, жумуш берүүчү суратып алышы керек.
Асанов аталган мыйзамды ИИМ дагы колдоого аларын билдирди.
"Негизинен мыйзам долбоорунун концепциясын колдойбуз. Бирок айрым жагдайлар боюнча өзгөртүүлөрдү киргизиш керек. Электрондук өкмөт ишке кирип калса, мыйзам жакшы жыйынтык берет. Анын арты менен жарандар 10 мүнөттүн ичинде эле соттолбогондугу боюнча маалым кат ала алат", — деди Асанов.
Мыйзам долбоору кызуу талкуудан кийин добуш берүүгө жөнөтүлдү.
