Карасартова: өлкөнүн чет жерде соттолгон жаранды куткаруу милдеттенмеси жок

Чет өлкөгө иштегени же билим алганы кеткен жаранга ошол жактагы элчилик же консулдук укуктук жактан багыт берип турушу зарылдыгын Sputnik Кыргызстан агенттигине "Коомдук иликтөө институтунун" жетекчиси Рита Карасартова билдирди.

"Мага Кыргызстандагы Россия элчилигинин иш-аракеттери жагат. Биздин мекемеге Россиянын жарандары жардам сурап кайрылып калышат. "Биз тууралуу кайдан билдиңер?" деп сурасак, элчилик айтты дешет. Көрсө аларда укук коргоочулардын тизмеси бар экен. Ким эмне иш менен алек болсо, ошого жараша өз жарандарын жиберип турушат. Анан, албетте, көйгөй менен жардам сурап кайрылган адам аз да болсо колдоого ээ болот. Негизи мамлекетте башка мамлекетте соттолуп кеткен адамды сөзсүз куткарып алыш керек деген милдеттенме жок. Болгону алар туура багыт берип турганы жакшы", — деди Карасартова.

Ошондой эле укук коргоочу Кыргызстандын чет өлкөлөрдөгү өкүлчүлүктөрдө укук коргоочулар тууралуу маалыматтар болуп, алар кыргызстандыктарга берилип турушу зарылдыгын кошумчалады.