БИШКЕК, 7-фев. — Sputnik. АКШ Россияга каршы маалыматтык согуш үчүн атайын борбор түзүүдө. Ал АКШнын мамдепартаментиндеги анча белгилүү болбогон Глобалдык өз ара кызматташуу борборунда болорун РИА Новости агенттиги Daily Beast басылмасына таянуу менен билдирди.
Мындай демилге республикачы сенатор Роб Портман менен демократ Крис Мерфиге таандык. Аталган борбор быйыл ишке кирип, ал үчүн эки жылда 160 миллион доллар бөлүнгөн. Ошол эле учурда сенаторлор Жон Маккейн менен Бен Кардин Россияга карата киргизилген санкциялардан улам жана орустардын "объективдүү журналистикасына" туруктуу болуу үчүн кошумча 100 миллион доллар бөлүүнү сунушташкан.
Жаңы борбор чет элдик пропагандалык кампанияларды иликтеп, алардын маалыматына карата тийиштүү сокку берүү үчүн чет элдик журналисттерге, жарандык уюмдарга жана жеке компанияларга гранттарды бөлөрү айтылууда. Жеке компаниялардын арасында Bellingcat Stopfake.org бар.
Аталган борбор Барак Обаманын тушунда эле "Ислам мамлекети" террордук уюмунун пропагандасына каршы туруу үчүн түзүлгөн.
