БИШКЕК, 7-фев. — Sputnik. Афганистанда согуш учурунда жана террорчулардын аракеттеринен улам 2016-жылы каза таап, жаракат алган жай жашоочулардун саны рекорддук көрсөткүчкө — 11,5 миң адамга жетти. Бул туурасында РИА Новости Бириккен улуттар уюмунун (БУУ) аталган өлкөдөгү миссиясынын маалыматына таянып кабарлады.
Аталган уюм 2009-жылдан тарта бул өлкөдөгү согуштан жабырлангандардын эсебин алып келет. Алардын айтымында, былтыр бул жаатта сандар 24 пайызга өскөн.
Афганистандагы "Талибан" радикалдык кыймылы өлкө аймагында жасалган кандуу окуялардын үчтөн бирин жасагандыгын мойнуна алып келет.
Акыркы мезгилдери бул аймакта "Ислам мамлекети" террордук уюмунун согушкерлеринин саны кескин өсүп кеткен. 2016-жылы аталган уюмдун террорчуларынын колунан 209 киши мерт кетип, 690 адам жаракат алган.
"Афганистандагы үрөйдү учурган бул жагдайда бардык тараптар карапайым афган аялдардын, балдардын жана кишилердин өмүрүн коргоо үчүн тезинен чечим кабыл алышы зарыл", — деди БУУнун Башкы катчысынын өкүлү Тадамичи Ямамото өлкөдөгү кыйылган өмүрлөр боюнча.
Афганистандагы БУУнун миссиясы 2002-жылдын 28-мартында түптөлгөн. 2015-жылдын 1-январынан тарта бул өлкөдө "Чечкиндүү колдоо" деп аталган жаңы миссия ишин баштаган. НАТО менен Афганистандын эки тараптуу келишиминин негизинде учурда аталган аймакта 12 миңге чукул аскер бар. Алардын азыркы милдети — афгандык күч түзүмдөрүнө кеп-кеңеш берип туруу деп айтылып келет.
