БИШКЕК, 3-фев. — Sputnik. Кыргызстан мусулмандарынын дин башкармалыгы (КМДБ) Жалал-Абад облусундагы диний окуу жайларды текшерип чыкканын муфтият билдирди.
Маалыматка ылайык, текшерүү иштерине КМДБнын окуу бөлүмүнүн башчысы Замир кары Ракиев, бөлүм кызматкери Орозали ажы Адраңов жана муфтияттын иш башкаруу жана чарба бөлүмүнүн башчысы Алимбай Эргешов катышкан.
Жыйын жүрүшүндө Замир кары Ракиев 2017-жыл ичинде диний окуу жайлардын окуу процессин стандартка ылайык жүргүзүү жана диний окуу жайларды тажрыйба алмашуу жолу аркылуу өнүктүрүүнү ишке ашыруу жолдорун түшүндүрүп, муфтият тараптан коюлган бардык талаптарга ылайык иштөө зарылдыгын эскертти.
Ал эми Орозали ажы Адраңов бардык диний окуу жайларында иш кагаздарын жүргүзүүнүн тартибин жөнгө салуу, бүтүрүүчүлөрдү тактоо жана инвентаризация иштерин жүргүзүү тапшырмаларын берди.
