БИШКЕК, 01-фев. — Sputnik. Бишкек шаардык билим берүү башкармалыгы мектеп директорлору үчүн семинар уюштурду. Анда балдарды суицидге үндөгөн социалдык тармактардагы топтор тууралуу талкууланган. Бул тууралуу мэриянын маалымат кызматынан кабарлашты.
Буга чейин кыргызстандык өспүрүмдөр социалдык тармактар аркылуу "морекитов", "тихий дом", явигре" жана "разбудименяв420" хэштегдери менен бөлүшө баштаганы айтылган. Ал эми Россиянын укук коргоо органдары өспүрүмдөрдүн өз өмүрүнө кол салып жатышына аталган хэштегдердин тиешеси бар экенин билдирген.
"Чакырылган директорлорго балдардын аң-сезимине терс таасир тийгизген оюндар тууралуу презентация өткөрүлдү. Бул оюндарга берилип кеткен балдар — кайгыга батып, бетин колу менен жаап, сөөмөйүн көрсөтө баштайт. Ушул жана башка маалыматтар мугалимдер менен талкууланды", — деп айтылат билдирүүдө.
Буга чейин Билим берүү министрлиги аталган оюндун кооптуулугу чоң экенин билдирген. Ал эми ИИМ бул факты боюнча иш алып барарын билдирип, өлкөдөгү суициддердин бири дагы интернетке байланышы жок экенин белгилеген.
