БИШКЕК, 30-янв. — Sputnik. Instagram социалдык тармагындагы "Молодые мамочки" баракчасынын администратору Асема аттуу айым Кыргызстандын жаштары дагы мындай жүрөк үшүн алган нерсеге кызыгып жатканын Sputnik Кыргызстан агенттигинин кабарчысына билдирди.
Буга чейин РИА Новости агенттиги Россияда социалдык тармактарда өспүрүмдөрдү өлүмгө үндөгөн топтор өтө популярдуу болуп баштаганын жазган. Мисалы мындай чакырыктагы хэштег менен бир күндө "ВКонтакте" социалдык тармагында төрт миңдей билдирүү жарыяланган. Россияда расмий түрдө өз өмүрүнө кол салган 15 учур катталган. О дүйнө салгандар түрдүү "өлүм топторуна" мүчө болушкан.
"Ушундай кырдаал Кыргызстанда дагы пайда болгонун мага биздин баракчага жазылган таанышым билдирди. "Море китов", "тихий дом", "хочу в игру", "разбуди меня в 4.20" хэштеги менен билдирүүлөрдү кыргызстандык жаштар дагы бөлүшүүдө. Бир сөз менен айтканда бул оюн экен. Оюнга катышпагандар кийинкилерге тапшырма берип, алар өз өмүрүнө кол салууга чейин барышат", — деди Асема.
Ал ошондой эле, "Молодые мамочки" баракчасына жазылган энелер мындайды укканда жүрөктөрү түшүп, балдарынын телефондорун текшерип баштаганын кошумчалады.
Ал ортодо Instagram тармагында жогорудагыдай хэштег менен билдирүү жазгандар көп экенин жана алар бул оюнду ойноого даяр экенин Асема кошумчалады. Колдонуучулардын бирөө бөлүшкөн эрежелерге караганда, оюн 50 күнгө чейин созулат.
"50-күндө оюн бүтөт. Эгер сен өлсөң — жеңишке жетесиң. Өлбөй калсаң сага жардам беришет", — деп колдонуучу оюндун эрежеси менен бөлүшкөн.
"Тихий дом" хэштеги менен бөлүшкөн Instagram колдонуучуларынын бири менен Sputnik Кыргызстан агенттигинин кабарчысы байланышка чыгып, анын постунун маңызына кызыгып көрдү.
"Мен тамашалап эле жазып койгом. Бирок айрым кыргызстандык кыздардын жазган постторуна караганда, суицид жасоого чындап эле белсенип алышкан", — деди колдонуучу.
Кыргызстандын Ички иштер министрлиги аларга "өлүм топтору" жөнүндө өлкө аймагынан билдирүү келе электигин белгилешип, укук коргоо органдары тарабынан окуянын чоо-жайы иликтенерин айтышты.
Өспүрүмдөрдүн жүрүм-туруму боюнча Кыргызстандын психологдор ассоциациясынын президенти Михаил Мунькин ата-энелерге бир нече кеңештерди берди.
"Айрым өспүрүмдөр чындап эле өз өмүрүнө кол салуу боюнча ойлонушу мүмкүн. Мындай балдар депрессияда болот. Алар бирөөгө куса болуп, капаланып жүрүшү ыктымал. Мындай абалга кабылган балдар сабактарына жетишпей, начар окушат", — деди Мунькин.
Психолог мындай балдардын ата-энелерине балдары менен сүйлөшүүнү сунуштайт. Жумуштан, акча табуудан тышкары балага да көңүл буруу керектигин эскертет.
Мунькин эгер баланын өзүнө кол салуу тууралуу оюн билип калсаңыз адистерге же үй-бүлөлүк психотерапевттерге кайрылуу керектигин белгиледи.
Ал эми Россиядагы айрым колдонуучулар балдар мындай топтордун таасирине тушукканын билүү үчүн айрым сунуштар менен бөлүшө башташты.
- Эгер балаңыз баракчасын сизге дагы көрсөтпөй катса, эмнеге андай кылып жатканын акырын суроо керек.
- Эгер сүрөткө түшкөндө балаңыз бетин колу менен же кийими менен жаап, сөөмөйүн көрсөтүп жатса, ал суицид тууралуу ойлоп жатышы мүмкүн.
- Эгер балаңыз баракчасына колу, буту тытылган сүрөттөрдү коюп, аларды бөлүшүп жатса шектенүүгө негиз бар.
- Андан сырткары жогору жакты көздөй жылып бараткан медуза, мышык, көпөлөк же киттин сүрөттөрүн койсо этият болуңуз.
- Балаңыз жаман чөйрөгө туш болуп калды деп шектенсеңиз анын жакын арада пайда болгон "шектүү" досторуна көз салыңыз.
- Өлүм темасына арналган Сергей Есенин жана Иосиф Бродскийдин ырларын көп бөлүшсө да абайлаңыз.
