БИШКЕК, 28-янв. — Sputnik. 29-январдан 1-февралга чейин өлкө аймагында туруксуз аба ырайы күтүлө турганын Кыргызгидормет билдирди.
Маалыматка ылайык, бул күндөрү мезгил-мезгили менен кар жаап, 31-январда айрым жерлерде катуу жаашы күтүлөт. Ош, Жалал-Абад облустарында зымдарга жана бактарга суу кар жармашат. Жолдор тайгак, тоңголок болуп, тоолуу аймактарда кар күрткүсү күтүлөт. Батыштан соккон шамалдын ылдамдыгы кээ бир райондордо секундасына 15-20 метрге жетет.
Эртең Бишкек менен Ош шаарларында түнкүсүн —4, ал эми күндүз 5 градуска чейин жылуу болот.
Кыргызгидромет кар көчкү түшүү кооптуулугу жана жолдун тайгактыгынан улам унаалардын ортосундагы 500 метр аралыкты сактоо зарылдыгын эскертет.
