БИШКЕК, 23-янв. — Sputnik. Бишкек — Ош унаа жолуна кар көчкү түшкөндүгүнө байланыштуу Сосновка өткөрмө пунктусу убактылуу жабылганын ӨКМден кабарлашты.
Билдирмеге караганда, чектөөлөр бардык унаалар үчүн киргизилген.
"Бүгүн саат 5.28де Бишкек — Ош унаа жолунун 247-чакырымындагы Чычкан капчыгайында 7200 куб метр кар көчкү түшүп, жол убактылуу жабылды. Алдын ала маалыматтар боюнча кар көчкү оор жүк ташуучу унаанын арткы бөлүгүнө түшүп олуттуу залал келген эмес. Кырсыктан жабыркагандар жок", — деп айтылат маалыматта.
Учурда жолду тазалоого №23 Жол тейлөө ишканасынан бир грейдер жана эки жүктөгүч тартылып, тазалоо иштери жүргүзүлүүдө.
