БИШКЕК, 19-янв. — Sputnik. Дача айылына кулап түшкөн учактагы жүктүн Кыргызстанга тиешеси жок. Бул тууралуу "Манас" эл аралык аэропорту" ААКтын маалымат кызматы билдирди.
Буга чейин Жогорку Кеңештеги "Ата мекен" фракциясынын лидери Өмүрбек Текебаев колунда кулаган учак май куюу үчүн эмес, Кыргызстанга жүк түшүрүү үчүн конмоктугун тастыктаган документ бар экенин айтып, өкмөт бир нерсени жашырып жатат деп шектенген.
Аэропорттон билдиришкендей, учак май куюу үчүн жана экипажды алмаштыруу үчүн конууга аракет кылган. Түркиянын жарандык авиациясынын талабы боюнча алты сааттан ашык учкан экипаж алмашуусу керек.
Эске салсак, 16-январда Гонконг — Стамбул каттамы менен учкан MyCargo Airlines авиакомпаниясына таандык Boeing-747-400F учагы "Манас" аэропортуна жакын жердеги Дача айылына кулап түшкөн. Анын кесепетинен 38 киши каза болуп, 23 үй бузулган.
