БИШКЕК, 19-янв. — Sputnik. Ураган учактын жүгү боюнча өкмөт чындыкты жашырып жатат. Бул тууралуу "Ата Мекен" фракциясынын лидери Өмүрбек Текебаев парламентте ар кандай маселелер каралып жатканда билдирди.
2017-жылдын 16-январында Гонконгдон Стамбулду көздөй келе жатып, Бишкектен май куюу үчүн "Манас" аэропортуна токтомок болгон Boeing-747 учагы Дача айылынын үстүнө саат таңкы 7:18де кулаган. Кырсыктан 38 киши көз жуумп, 16 киши жабыркаган. 17-январь Кыргызстанда аза күнү деп жарыяланган.
"Өкмөт буга чейин кыйраган учак үч жолу конууга аракет кылды деп айткан. Бүгүн түз эле келип кырсыктаганы көрүнүп турат. Менин колумда турган учакка ээлик кылган компаниянын билдирүүсүнө ылайык, учак май куюу үчүн эмес, жүк алып келген. Өкмөт болсо май куюу үчүн келген деп чындыкты жашырып жатат. Депутаттык комиссия түзөлү", — деди Текебаев.
Текебаевдин пикирин "Өнүгүү — Прогресс" фракциясынын лидери Бакыт Төрөбаев менен "Бир Бол" фракциясынын лидери Алтынбек Сулаймановдор колдоп, депутаттык комиссия түзүү керектигин билдиришти.
Спикер Чыныбай Турсунбеков бардык кадам регламенттин негизинде болорун айтып, тиешелүү комитеттин чечими керектигин билдирди.
