КТРК журналистимин деген жаран алдамчылыкка шектелип кармалды. Бул тууралуу Sputnik Кыргызстан агенттигине Араван райондук ИИБнын башчысынын орун басары Нурлан Жанбаев билдирди.
Анын айтымында, шектүү жаңы жылдын алдында мектеп директорлоруна "жылдын мыктысы" наамы берилет деген шылтоо менен акча өндүргөн.
"Белгисиз жаран өзүн КТРКнын журналистимин деп алдап, сегиз мектеп директорунан акча өндүргөн. Ал телеканалдын демилгеси менен Ош шаарында чоң маараке өтүп анда аталган директорлорго "жылдын мыкты директору" деген наам берилет деп айткан. Мындан тышкары, эки айыл өкмөтүнөн дагы акча алууга жетишкен", — деп билдирди Жанбаев.
Ал шектүү жаран Кара-Суу районунда дагы ушундай алдоо жолу менен 17-18 жолу акча тапканын кошумчалады.
Учурда аталган фактынын негизинде тергөө иштери жүрүп жатат.
