2016-жылдын аягына чейин Интерпол аркылуу изделген кыргызстандык кыз-келиндердин саны экиге гана кыскарган. Жыл башында 24 киши болсо, азыр 22 аял таптырбай жүрөт. Интерполдун сайтында 160 кыргызстандыктын аты-жөнү илинип турат. Алардын жарымынан көбү экономикалык кылмыштар үчүн издөөгө алынган.
Алардын дээрлик жарымы (тогуз аял) алдамчылык менен айыпталып, издөөгө алынган. Төрт аялга баңгизатты сатуу же сактоо боюнча кине коюлган. Эки кыргызстандык аялдын жеке өзүнө кылмыш иши козголгон. Дагы эки аял кызмат абалынан кыянаттык менен пайдалануу жана паракорчулук боюнча айыпталган. Ал эми бир аял террордук уюмдарга жардам берген деген айып менен изделип жатат.
Аталган аялдардын аты-жөнү Интерполдун сайтына Кыргызстандык укук коргоо органдарынын сунушу менен жайгаштырылган. Эгер бул жарандарды көрүп-билип калгандар болсо жакынкы ички иштер органдарына кайрылып коюуну суранышат.
1. Олуттуу экономикалык кылмыш үчүн издөөгө алынгандардын башында 63 жаштагы Елена Белковская турат. Ал Аскар Акаев президент болуп турганда өкмөттүн укук бөлүмүн жетектеген. Белковская 2009-жылы "Кумтөр" долбоору боюнча келишимге кол коюуда коррупциялык алдамчылыкка барган деп айыпталууда.
Өзгөчө белгилери: кара чачтуу көк көз аял, бою 167 сантиметр.
2. Издөөгө алынган кыргызстандыктардын ичинен эң улуусу 69 жаштагы Кашко Людмила Николаевна. Ал алдамчылык жана кызмат абалынан кыянаттык менен пайдаланган деп айыпталууда. Орусчадан башка тил билбейт.
3. 61 жаштагы Муяссархан Жалалова дагы алдамчылык боюнча издөөгө алынган.
Өзгөчө белгилери: бою 165 сантиметр, салмагы 75 килограмм, чачы күрөң, кой көз
4. Ал эми Ысык-Көл облусунун 52 жаштагы тургуну Осмоева Салтанат Сатаровна жалган ишкерлик кылганы үчүн издөөгө алынган.
Өзгөчө белгилери: бою 155 сантиметр, салмагы 60 килограмм.
5. Ысык-Көл облусунун дагы бир 52 жаштагы тургуну Айнура Сыдыкова баңгизатын жайылтканы үчүн изделип жатат.
6. Кыргызстандын мыйзамсыз чыгып кеткени жана документтерди жасалмалаганы үчүн 28 жаштагы Айна Кошумова дагы Интерпол аркылуу издөөгө алынган.
Өзгөчө белгилери: кой көз, бою 165 сантиметр, салмагы 60 килограмм.
7. Документтерди жасалмалаганы үчүн Чүй облусунун 27 жаштагы тургуну Карина Рустамова изделет.
Өзгөчө белгилери: чачы кара, кой көз. Бою 170 сантиметр, салмагы 70 килограмм.
8. Террордук уюмга жардам берген деген шек менен 29 жаштагы Кундуз Дөөлөтжанова Интерполдун линиясы аркылуу эл аралык издөөгө алынган.
Өзгөчө белгилери: кой көз, бою 165 сантиметр, салмагы 65 килограммды түзөт.
9. Издөөгө алынгандардын ичинен эң жашы 26 жаштагы Волайдза Жейран Тахировна. Ата теги казак-күрд. Ага баңгизатын сатып, сактаган деген кине коюлууда. Кыргызстандын жараны болгон Жейран Казакстандын Түштүк-Казакстан аймагында төрөлгөн. Орус жана күрд тилин билет.
Интерполдун жаңыланган тизмесинде 22 жаштагы Үмүт Жангазиеванын аты-жөнү чыккан жок. Ал эл аралык издөөгө алынган эң жаш кыргызстандык катары белгилүү. Жангазиева киши уурдады деп издөөгө алынган болчу.
Тизмедегилердин жарымы алдамчылык боюнча изделип жаткандыктан көбүнүн сүрөттөрү Интерполдун сайтында жок болуп чыкты.
