Кытайга жөнөтүлгөн 4 миң эшекти Ош облусунан алып чыгууга уруксат берилген. Бул тууралуу Ош ОИИБдин маалымат катчысы Жеңиш Ашырбаев билдирди.
Буга чейин аталган облус аймагынан Кытайга 300 эшек жүктөп бараткан алты унаа кармалганы аныкталган.
"Ош — Эркеч-Там унаа жолу менен Алайды көздөй бараткан алты унаада эшек жүктөлүп бара жаткандыгы тууралуу жарандардан маалымат түшкөн. Дароо милиция кызматкерлери барып, ар бир унаада 50дөн эшек бар экени далилденген. Бирок Кара-Суу райондук ИИБдин кызматкерлери иликтөө учурунда эшектер эки өлкөнүн келишими менен мыйзамдуу түрдө кетип жатканын аныкташты. Тактап айтканда, Кыргызстандан төрт миңден ашуун эшекти алып чыгып кетүүгө уруксат берилиптир", — деди Ашырбаев.
Ал эшектерди алып бараткандардын колунда тийиштүү документтердин баары болгондуктан, милиция аларды кое берүүгө аргасыз болгонун кошумчалады.
