БИШКЕК, 14-дек. — Sputnik. Саат 18:40тар чамасында Кыргыз агрардык университетинин жанында жол кырсыгы катталганын Бишкек ШИИБдин Кайгуул милициясы билдирди.
Милициянын берген маалыматына ылайык, Honda Fit автоунаасы Медеров көчөсү менен чыгыш тарапты көздөй бара жаткан.
"Унаа киши өтө турган жерден эки студент кызды коюп алган. Соккудан улам учуп кеткен жабырлануучуну айдоочу экинчи жолу тебелеп кеткен. Андан кийин каршы тарапта келе жаткан Audi-4 автоунаасы менен кагышкан. Кыздар оор абалда Бишкек шаардык Травматология жана ортопедия илим изилдөө борборуна жеткирилген. Эки айдоочу дагы ушул ооруканага түштү. Алардын абалы кандай экенин так айта албайыз", — деп Кайгуул милициясынан билдиришти.
Милиция териштирүү иштерин баштап, толук маалымат кийин бериле турганын кошумчалады.
