БИШКЕК, 25-ноя. — Sputnik. Стамбулда 9,5 млн. доллар менен кармалгандардын дагы бирөө кыргызстандык болуп чыкканын Түркиянын Yenişafak гезити жазып чыкты.
Гезиттин жазышынча кармалган жети кишинин экөө Кыргызстандын жараны болуп чыккан. Кармалган Исмаил Кашкарийдин жанынан эң көп суммадагы каражат — 5 миллион 359 миң доллар чыккан, ал Стамбулдагы бир фирманын директору болуп иштери айтылат.
Сурак учурунда ал кармалган каражаттар төрт компанияга тиешелүү экенин айтып, алардын Фетхуллах Гүлендин уюмуна эч кандай тиешеси жок экенин билдирген.
"Акыркы беш жылдан бери акчаны ушул эле кишилер ташып жүргөн. Бирок, декларацияда көрсөтүлчү. Мындай окуяга биринчи жолу кабылып жатабыз. Биздин колубузда керектүү баардык документтер бар", — деп Кашкарий айтканын Yenişafak гезити баса белгилейт.
Буга чейин Haberler басылмасы аэропорттон кармалган акчалар Түркиядагы аскердик төңкөрүш аракетинен кийин жумушсуз калган гүленчилерге берилмек экенин жазып чыккан.
КР Тышкы иштер министрлиги кармалгандардын экөө Кыргызстандын жарандары экенин тастыктады.
