БИШКЕК, 21-ноя. — Sputnik. Борбор калаанын автожолдоруна туурасынан жактырылган "жасалма полициялардын" бир метри 110 сом турат. Бул туурасында Sputnik Кыргызстан маалымат агенттигине муниципалитеттин маалымат кызматынан кабарлашты.
Буга чейин Бишкектин автожолдоруна туурасынан жаткырылган "жасалма полицияларды" жолдон алып салуу иштери шаардыктардын өтүнүчүнөн улам башталганын кабарлашкан. Себеби, ылдамдыкты азайта турган бул тоскоолдуктар тоңуп калып, автоунаалардын көбүнө андан өтүү кыйынчылыкты жаратып жаткандыгын жүйө келтиришкен.
"Мындай бетон тоскоолдуктарды алып салуу мэрия үчүн чоң деле жумуш эмес. Аны жолдон кырып, алып сала турган техникабыз бар. Бул муниципалдык кызматтардын аткара турган иштеринин бири", — деп билдиришти мэриядан.
Ылдамдыкты азайта турган мындай бетон тоскоолдуктардын бийиктиги Бишкекте 7-10, ал эми эни 30дан 80 сантиметрге чейин жетет.
Шаар боюнча "жасалма полициялардын" саны 110 болсо, учурда алардын 52си алып салынды. Учурда бул иштер уланып, эми дагы 80и алынат.
