БИШКЕК, 18-ноя. — Sputnik. Ишемби күнү өлкө боюнча кар жаап, күн суук болот. Бул тууралуу Кыргызгидромет билдирди.
18 Жетинин айы 2016, 17:32
Зымдарга жана бактарга суу кар жармашат. Автожолдор тайгак жана тоңголок болуп, тоолуу аймактарда кар күрткүсү күтүлөт.
Батыштан соккон шамалдын ылдамдыгы секундасына 15-20 метрге жетет.
Чүй, Талас облустарынын дыйканчылык аймактарында, Ысык-Көл ойдуңунда, тоо этектеринде —3…-8 градус суук, Ош, Жалал-Абад, Баткен облустарынын өрөөндөрүндө 0…-5 градус суук, Нарын облусунда жана тоолуу райондордо —5…-10 градус суук, бийик тоолуу райондордо —10…-15 градуска чейин төмөндөшү күтүлөт.
Мындай туруксуз аба ырайы автоунаа, энергетика жана коммуналдык кызматтардын ишин жана кышкы жайыттарда малды кармоону кыйындатат.
