Диларам Жолдошбекова: Баткенде интернет клубду айланчыктаган балдар көбөйдү
Баткен облустук ИИБдин өспүрүмдөр менен иштөө инспекциясынын ага инспектору Диларам Жолдошбекова интернет клубдарда оюн ойногон балдардын саны көп болуп жатканын билдирди.
"Түнкү интернет клубдарда балдар ойноп жаткан учурлар көп. Аларды ички иштер органдарына алып келип, ата-энелерин чакыртабыз дагы түшүндүрүү иштерин жүргүзөбүз", — деп билдирди Жолдошбекова.
Ал түнкү интернет клубдардын иштөө убактысына чектөө бар экенин кошумчалады.
"Компьютердик клубдарга жайкысын 23.00, кышында 22.00го чейин иштөөгө уруксат берилет", — деди Жолдошбекова.
Маалыматка караганда, көрсөтүлгөн убакыттан кийин балдар клубдарда оюн ойноп жатканы белгилүү болсо клубдун ээсине административдик айып пул салынат.
