Студенттер вахтерлорго эбак ат коюп алышкан
Жатаканага алгач пол жуугууч болуп кирип, коменданттын сунушу менен вахтер болуп иштеп калдым. Иштегениме 16 жылдын жүзү болду. Башында жумушум жаккан эмес. Кийин көнгөндөн соң кетким деле келбей калды. Бир чети оор, бирок студенттер менен иштешүү алда канча кызыктуу. Студенттер эртең менен бардыгы баш ийкеп учурашып өтүшөт. "Эмне жаңылык?" деп ал-жайыңды сурап турушат. Азыркылар пикир алышканды абдан жакшы өздөштүргөн. Жатаканада иштеген ар бир вахтерго тиешелүү мүнөздөмөлөр бар. Студенттер атын унутуп калганда "сары чач эже", "дайыма күлүп жүргөн эже", "урушчаак эже" деп алышат экен. Менин болсо бат жиним келип, кайра тез тарап кетет. Көптөр мени кыйкырганы менен чындап урушпайт деп айтып калышат.
Азыркы студенттерди илгеркилер менен салыштырып болбойт
Илгери студенттер арасында ызы-чуулар абдан көп болчу. Ар бир сменде жок дегенде бирден катталчу. Анда интернет деген жок болчу. Ар бир майрамда дискотека, кечелерди уюштуруп, залдарды шарлар менен кооздошуп, оюн-зооктун түрүн уюштураар эле. Азыркылар эмнегедир окуудан кийин тытынып иштеп, өз жандарын бакканга далалат кылышат. Анан конфликт деген нерселер көп каттала элек. Карылар үйүнө, балдар үйүнө барып коомдук иштерге активдүү катышкандарын көрөм. Ачка калып кулап калган студенттерди көп жылдан бери көрө элекмин. Ар бир доордун студенттери мен үчүн кызыктуу жана өзгөчө.
Алар биздин балдарыбыздай
Белгилүү адамдар студенттик күнүн сагынганда жатаканага баш багат
Мындан көп жыл мурун тележурналист Мыктыбек Арстанбек биздин жатакананын экинчи этажында жашап кетиптир. Эки жыл мурун окуу жайдын кечеси болгондо жашаган бөлмөсүнө баш багып, азыркы жашап жаткан балдарды көрүп "биз дагы силердей студенттик күндөрдү башыбыздан өткөргөнбүз" деп акча таштап кетиптир. Курулуш тармагында, бизнес жаатында эмгектенген ишкер балдарыбыз келип "ушул жакта душ бар эле, могул жерде дискоткека уюштурчу элек" деп келип кетишет. Ушул жакта жашап жүрүп университетке мугалим болуп бала-чакасы менен дагы деле жашап келе жаткандар бар. Бул жакта илгери кубалыктар окуган экен. Анан бирөөсү жайында "Ысык-Көлгө эле келгем, биротоло көрө кетейин" дедим деп бөлмөсүн сүрөткө тартып кетти.
Ала качуу, рюкзак менен ташылган сыра, жигитин жоготкон кыз
Мен өзүм кыздардын эки жолку ала качуусуна күбө болуп калдым. Бирөөсүн сабактан келгенден кийин алдап эшиктин алдына алып чыгып, сүйрөгөн бойдон ала качып баратканда артынан далдактап жетпей калганбыз. Экинчисинде коридордон сүйрөп баратканда биз кошо жулмалашып жатып алдырып ийгенбиз. Бирок эки кыз тең жакшы жашап кетишти. Кийин ак жоолуктарын салынып учурашып кетишкен.
Түн ичинде үчүнчү кабатка барсам бир кыз ыйлап жатат. "Эмне болду" десем, "жигитим мени сүйбөйм деп таштап кетти" деп буркурайт. Аны менен кошо мен сарсанаага батып, "кайгырба, келип калаар" деп отурдум. Кийинки сменде жигити экөө жетелешип келе жатат. Ичимден элдешиптир деп сүйүнүп калгам.
Кыздар урушканда акшыңдаса, балдар сыртка чыгып бүтүрүп келишет
Кыздар урушканда көз карашынан эле байкайм. Өтүп баратканда бири-бирин жактырбай, жерди оюп акшыңдап өтүшөт. Анан ичиңен "урушкан экен" деп каласың. Эркек балдардын урушу дароо билинет. Анткени ичтен урушпай, топтолуп алып сыртка чыгып бара жатканда бир нерсени шекшийбиз. "Ай, силер эмне уруштуңарбы" десек, "эже, отура бериңиз, баары жакшы эле" дешет.
Жакшы көргөн студент кыздарды өзүмдүкү кылып алам. Жардам керек болсо чуркап келишет. Жакшы балдарды көрсөм номерлерин берип тааныштырып коем. Негизи жатаканадан бактысын тапкандар толтура. Алардын бири сиздин маңдайда отурган Бермет.
— Бермет эже, мүмкүн болсо студенттик учурда башыңыздан өткөн кызыктуу окуялардан эстей кетпейсизби?
— Коңшу бөлмөдө туулган күн болуп балдар аябай майрамдап отурушуптур. Бизди да чакырышкан, анан ичип башташканда жактырбай кетип калдык. Өзүбүздүн бөлмөдө эшикти илип, жарыктын баарын өчүрүп, акырын телевизорду күйгүзүп үйдө жок кишидей отурганбыз. Бүрүшүп отурсак эле терезеде бир бала жабышып турат. Кинодогу жөргөмүш кишини көргөндөй эшикке бакырып атып чыктык. Көрсө, тиги бала эшиктен кире албай биринчи терезеден экинчисине аттап өтүптүр. Учуп кетсе эмне болот эле. Болгондо дагы 5-кабат болчу. Кийин бала өзүнүн аттап өткөнүнө таң калып жүрдү.
