БИШКЕК, 10-ноя. — Sputnik. Спирт ичимдиктерине тыюу салуу боюнча мыйзам долбоорундагы айрым пункттар кээ бир депутаттардын алкоголь өндүрүүчүлөрдүн кызыкчылыгын көздөп туруп алганы үчүн алып салынганын аталган мыйзам долбоорунун демилгечилеринин бири, КСДП фракциясынын депутаты Дастан Бекешев Sputnik Кыргызстан агенттигинде өткөн маалымат жыйында билдирди.
Башында мыйзам долбоорунда желим стакандарга куюлган 100 граммдык аракты сатууга да тыюу салуу каралган. Ошондой эле интернет аркылуу да соодалоого тыюу бар болчу, бирок Бекешев бул нормалар алынганын кошумчалады.
"Айрым депутаттар арак чыгарган компаниялардын таламын тымызын талашкандыктан кээ бир пункттар мыйзам долбоорунан алынды. Бир маалда эле баары бул демилгени сынга ала баштады, бирок эч ким сунуш айткан жок. Мыйзам демилгечиси болгон айрым депутаттар ойлорун өзгөрттү", — деди Бекешев.
Депутат акыркы кездери түн ичинде кылмыштар көп болуп, аялдар менен балдар да ичимдикти көп ичип калгандыктан бул мыйзам керектигин айтты.
Мыйзам долбоору экинчи окууга жөнөтүлдү.
