БИШКЕК, 10-ноя. — Sputnik. АКШдагы президенттик шайлоодо жеңишке жеткен республикачыл Дональд Трамптын жеңишине нааразы болгондор Лос-Анжелестеги негизги көчөлөрдүн бирин тосуп, бир нече чакырымга созулган автотыгындын пайда болушун шарттады. Бул тууралуу РИА Нововсти Ассошиэйтед Пресс агенттигине шилтеме берип билдирди.
Маалыматка ылайык, нааразы болгондор Лос-Анжелестен Голливудга кеткен жолду тосуп алышкан. Акция тынч мүнөздө өтүп, бир канча киши полиция тарабынан кармалган.
Ушундай эле нааразычылык акциясы Нью-Йорк, Чикаго, Вашингтон, Филадельфия, Бостон, Сиэтл, Портленд, Орегон, Остинде болгон.
Эске салсак, 8-ноябрда өткөн президенттик шайлоодо республикачыл Дональд Трамп жеңишке жеткен. Шайлоодо жеңишке жеткен президент 20-январдан тарта кызматына киришет. Демократ Хиллари Клинтон шайлоодо жеңилгенин моюндап, Трампка ийгилик каалады.
