БИШКЕК, 2-ноя.— Sputnik. Декабрдын башында дзюдо боюнча "Хан Манас" турнири өтө турганын Жаштар иши, дене тарбия жана спорт агенттиги билдирди.
Мелдеш 3-4-декабрь күндөрү Бишкекте өтөт. Азырынча таймашка катыша турган өлкөлөрдүн саны такталууда, бирок алдын ала маалымат боюнча учурда Иран катышууга макулдугун берген.
Бул Кыргызстанда өткөрүлүп жаткан жетинчи турнир. Жеңүүчүгө "Хан Манас" кубогу ыйгарылат.
Былтыр Казакстандын командасы көп медалга ээ болуп, "Хан Манас" кубогун алып кеткен. Анда мелдешке Кыргызстан, Казакстан, Тажикстан жана Өзбекстандын спортчулары катышкан.
Кубок өзү колодон куюлуп, ага алтын жалатылган.
