БИШКЕК, 1-ноя. — Sputnik. Улуттук банк Жусуп Баласагындын 1000 жылдыгына карата коллекциялык күмүш монетаны чыгаргандыгы тууралуу банктын маалымат кызматынан кабарлашты.
Билдирмеге караганда, күмүш тыйындар 1-ноябрь күнү жүгүртүүгө чыкты.
"Улуттук банк орто кылымдагы белгилүү акын, ойчул, түрк поэзиясынын негиздөөчүсү, окумуштуу-энциклопедист, мамлекеттик башкаруу ишинин теориясы менен практикасына, түрк дүйнөсүнүн руханий жана маданиятына эбегейсиз салым кошкон инсанга арналган "Жусуп Баласагынга 1000 жыл" коллекциялык күмүш монетасын чыгарды", — деп айтылат маалыматта.
Монетанын алдыңкы бетине Жусуп Баласагындын күмбөзүнө түшүрүлгөн портрети менен Бурана мунарасынын фрагменти чагылдырылган. Ал эми арткы бетине "Кутадгу билиг" поэмасынан алынган саптар жазылган. Монетанын салмагы 28,28 граммды түзөт.
