Улуттук электр тармагы зымга тоңуп аварияга алып келген 30 см музду көрсөттү

БИШКЕК, 28-окт. — Sputnik. Өлкөнүн түндүк аймагы жогорку чыңалуудагы электр зымдары тоңгон 30 сантиметрлик муздан улам жарыксыз калмактыгын "Кыргызстан улуттук электр тармактары" ААКтын маалымат кызматынын жетекчиси Элзада Саргашкаева Sputnik Кыргызстан агенттигине билдирди.

Анын айтымында, Токтогул районундагы "Токтогул ГЭС — Фрунзе" жогорку чыңалуудагы линиясынын деңиз деңгээлинен 2000 метрден жогору жайгашкан аймактарында авария болгон.

"220 кВ болгон беш (Главная, Чүй, Ысык-Көл, Ак-Кыя, Узловая жана Төрөбаев) көмөкчордондо чыңалган абалды жөнгө салуу үчүн автоматтык түрдөө өчүү болгон. Бул абалдан жаңы курулган Датка — Кемин электр линиясына ыкчам өтүү менен чыгууга мүмкүн болду. Андыктан өлкөнүн түндүгүндө электр энергиянын тартыштыгы байкалган жок", — деди Саргашкаева. 

Ал ошондой эле авариялык өчүү болгон аймакка адистер чыгып кеткенин кошумчалады.

"1,5 метр жааган кар ал жакка атайын техниканын баруусуна мүмкүнчүлүк бербегени менен кыйынчылык жаратты. Электр линияларын текшерүү учурунда аны 30 сантиметрлик муз каптап калганы аныкталды. Кыска мөөнөттүү бузулуу калыбына келтирилип, электр линиясы иштеп жатат. Учурда Кыргызстандын электр системасы кадимки режимде", — деди ал.

"Токтогул-ГЭС — Фрунзе" 500 кВ жогорку чыңалуудагы электр линиясынын узундугу 207,3 чакырымды түзүп, барууга оор болгон беш тоо ашуусу аркылуу өтөт. Анын айрым бөлүгү деңиз деңгээлинен 3500 метр бийиктикте жайгашкан. "Датка — Кемин" 500 кВ жогорку чыңалуудагы электр линиясына чейин жогорудагы электр линиясы өлкөнүн түндүгүн камсыздаган жападан жалгыз электр линиясы болуп келген.