БИШКЕК, 26-окт. – Sputnik. АКШнын аскердик аба күчтөрүнүн учагы 21-октябрда Ирактагы Мосул шаарынын түштүк бөлүгүндөгү кыздар окуган Аль-Хаж Юнус мектебине сокку урду. Бул тууралуу Россиянын аба күчтөрүнүн негизги иш башкармалыгынын башкы штабынан Сергей Рудской билдирди деп жазды РИА Новости.
23-октябрда АКШнын аскердик аба күчтөрү Мосулдун түндүгүндөгү Каракхараб жана Эш-Шура бөлүктөрүнө бомба таштап, коомдук бир топ жайлардын кыйроосуна алып келген.
Рудскойдун айтуусунда, АКШ башында турган коалициянын соккусунан акыркы үч суткада эле балдарды кошкондо 60 адам өлүмгө учурап, 200дөй адам жарадар болгон.
Мындан улам, "Ислам мамлекети" террордук уюмунун мүчөлөрү Ирактан Сирияга жөнөшүүдө. Рудской билдиргендей, Сириянын Дейр-эз-Зор шаарына 300гө чукул террорчу барган.
