БИШКЕК, 22-окт. — Sputnik. Ирактын Мосул шаарынан анча алыс эмес жерде "Ислам мамлекети" террористтик топтун согушкерлери 284 чоң киши менен эркек балдарды өлүм жазасына тартканын CNN телеканалына таянуу менен РИА Новости жазып чыкты.
Жазага тартуу бейшемби жана жума күндөрү өтүп, маркумдардын сөөгү шаардын карама-каршысындагы жайга массалык түрдө жерге берилди.
17-октябрга караган түнү Ирактын премьер-министри Хайдер аль-Абади Мосулду бошотуу боюнча аскердик операция башталганын жар салган. Өлкөнүн куралдуу күчтөрү жана АКШ башында турган батыш коалициясынын колдоосу менен түзүлгөн күрд жоокерлери Мосулга массалык чабуул баштаган.
"Ислам мамлекети" тобунун согушкерлери өлүм жазасын коркутуунун ыкмасы катары пайдаланат — августта Ирактын Хавиджа шаарында 85 кишини жок кылып, шаардан качууга аракет кылган 3 миңге чукул тургунду туткундаган.
