БИШКЕК, 19-окт. — Sputnik. Шаршемби күнгө караган түнү Кыргызстандын аймактарында, анын ичинде Бишкекте кар жаады. ӨКМ буга чейин 17-19-октябрда республика боюнча аба ырайы кескин түрдө өзгөрөрүн эскерткен. Sputnik Кыргызстан агенттигинин кабарчысы өлкөнүн аймактарында жааган кардын сүрөттөрүн тизмектеди.
Жалал-Абадда быйылкы күздүн эсебинен биринчи жолу кар жаады. Шаар жолдору тоңгон жок. Балдар кар менен ойногонго аракет кылышты. Ал эми абанын температурасы 5-10 градусту түздү.
Караколдогу биринчи кар октябрь айынын башында эле жааган. Анын натыйжасында айрым аймакта бак-дарактар кулап, шаардын бир бөлүгү электр энергиясыз калган. Бүгүн абанын температурасы Ысык-Көл облусунда 0 градустан +5 градуска чейин көтөрүлдү.
Ош облусунда жааган биринчи кар эрип калды. Муниципалдык кызматкерлер эшикте өскөн гүлдөрдү күнөсканаларга көчүрө башташты. Ош облусунда абанын температурасы 5-10 градуска чейин жылуу.
Таластыктар карды күткөн эмес экен. Айрым дыйкандар фасоль, картошка сыяктуу түшүмдөрүн жыйнай элек. Жергиликтүү бийлик кечке чейин шаар тургундарына жылуулук берерин айтты. Социалдык мекемелерде жылуулук берилген. Көпчүлүк тургундар көмүр сатып ала электери үчүн арызданышууда. Талас облусунда абанын температурасы 0-5 градуска чейин көтөрүлөт.
Ал эми Нарында кар жок. Бирок бул аймак Кыргызстандын эң суук жери деп эсептелет. Бүгүн бул жакта күн тийип, абанын температурасы 3 градустан 8 градуска чейин жогорулады.
Баткенде дагы кар жааган жок. Бул жакта азырынча чыныгы күз өкүм сүрүп турган кез. Баткенде күндүз аба ырайы 5-10 градуска чейин жогорулайт.
Бишкекте эртең менен кар жаап жаткан. Жолдор тайгак болгон жок.
